బంగ్లాదేశ్ - విప్లవకారులు ముదిరి దేశద్రోహులుగా !

 విప్లవకారులు ముదిరి దేశద్రోహులుగా !

ఒక దేశం లో రెండు భాగాలు .

వాటి మధ్య దూరం వెయ్యి మైళ్ళు .

ఒక భాగం రెండో దానిపై పెత్తనం .

.... ఇదీ ఒకప్పటి పాకిస్థాన్ .

ఇప్పుడైతే ఒకటే పాకిస్థాన్ .

కానీ అప్పట్లో రెండు పాకిస్థాన్లు.

పశ్చిమ పాకిస్థాన్ . తూర్పు పాకిస్థాన్ .

నాటి తూర్పు పాకిస్థానే యాభై ఏళ్ళ క్రితం బంగ్లాదేశ్ అయ్యింది .

బంగ్లాదేశ్ అంటే బెంగాల్ ప్రాంతం .

ఇంకో మాటలో చెప్పాలంటే తూర్పు బెంగాల్ - ఇదే బంగ్లాదేశ్ .

పశ్చిమ బెంగాల్ మన దేశం లో రాష్ట్రం .

నేటి బంగ్లాదేశ్ వెయ్యేళ్ల క్రితం బౌద్ధ మత ప్రాంతం .

మౌర్య- గుప్త రాజ్యాలనాడే ఇక్కడ బౌద్ధ మతం వెలుగు వెలిగింది .

ఢిల్లీ సుల్తానుల కాలం లో భక్తియార్ ఖిల్జీ ఈ ప్రాంతాన్ని జయించి ఇక్కడ ఇస్లాం మతాన్ని ప్రవేశపెట్టాడు . ఇతను హింసాత్మక విధానాలను అనుసరించాడు .

షా జలాల్, ఖాన్ జహాన్ అలీ అనే సూఫీ గురువుల కాలం లో ఇక్కడ పెద్ద ఎత్తున మతమార్పిడీలు జరిగాయి .

1905 లో బ్రిటిష్ గవర్నర్ జనరల్ లార్డ్ కర్జన్ బెంగాల్ను మత ప్రాతిపదికన విభజించాడు . ఆ విధంగా తూర్పు బెంగాల్ ఏర్పడింది .

అదే ఇప్పటి బంగ్లాదేశ్ .

1947 దేశ విభజన జరిగింది .

ఇండియా పెద్ద దేశం .

మత ప్రతిపాదికన ఏర్పడిన దేశం పాకిస్థాన్ .

ఇందులో రెండు ముక్కలు . పశ్చిమ పాకిస్తాన్ . తూర్పు పాకిస్తాన్ .

తూర్పు పాకిస్తాన్ ప్రజలు తమ ప్రత్యేకతను నిలుపుకోవాలి అనే కాంక్ష కలిగిన వారు .

వీరిలో ప్రజాస్వామ్య స్ఫూర్తి ఎక్కువ .

పశ్చిమ పాకిస్తాన్ ఆధిపత్యాన్ని సహించలేక పోయారు .

ఫలితం 1960 లలోనే బెంగాలీ జాతీయ ఉద్యమం మొదలయ్యింది . దీనికి నాయకుడు ముజీబ్ ఉర్ రెహమాన్ .

ఈయన పార్టీ పేరు అవామీ లీగ్ .

తమకు ప్రత్యేక కరెన్సీ, స్వయం పాలన , ప్రత్యేక ఆర్మీ ఉండాలని 1966 లో అవామీ లీగ్ ఆరు పాయింట్ల డిమాండ్ పత్రాన్ని సమర్పించింది .

పశ్చిమ పాకిస్తాన్ నాయకులది అధికార బలుపు. అందుకే పట్టించుకోలేదు

అధికారం లో ఉన్నవారికి కన్ను మిన్ను కానరాదు .

అధికారం తో ఏమైనా చెయ్యొచ్చు అనుకొంటారు .

తాము ప్రజాస్వామ్య యుగం లో ఉన్నామని మరిచి పోతారు .

తమ గొయ్యి తామే తవ్వు కొంటారు .

నెపోలియన్ , పశ్చిమ పాకిస్తాన్ మిలిటరీ నాయకులు..అంతెందుకు విప్లవ బిడ్డ హసీనా ఇప్పుడు చేసింది ఇదే .

మిలిటరీ తో ప్రజా ఉద్యమాలను అణచివేయడం .

1971 లో పశ్చిమ పాకిస్థాన్ ప్రభుత్వం అదే పని చేసింది .

యాహ్యా ఖాన్ పాకిస్తాన్ మిలిటరీ నాయకుడు .

ఇక్కడ ఇందిరా గాంధీ.

అప్పటికింకా ఆమెకు అధికార మదం తలకెక్కలేదు . పేరు- పదవి నిలుపు కోవాలి అనే తపన .

ఆమె తెలివిగా ఈస్ట్ పాకిస్తాన్ కు చెందిన ముక్తి వాహిని కి మద్దతు ఇచ్చి పాకిస్థాన్ రెండుగా విడిపొయ్యేలా చేసింది . పాకిస్తాన్ ను ఓడించింది .

ఫలితం 1971 లో బంగ్లాదేశ్ ఆవిర్భావం .

ముజీబ్ ఉర్ రెహమాన్ బంగ్లా విముక్తి నాయకుడు . ఆయనే తొలి ప్రధాని అయ్యాడు .

కానీ 1975 లోనే ఆయనను మిలిటరీ ఆఫీసర్స్ హత్య చేసారు . ఆయన తన కుటుంబ సభ్యులతో సహా దారుణ హత్యకు గురయ్యాడు .

ఆయన కూతురు షేఖ్ హసీనా .

తండ్రి హత్యకు గురయ్యే నాటికి తన భర్త తో కలిసి జర్మనీ లో చదువుతోంది .

౧౯౮౧ లో ఆమె బంగ్లాదేశ్ కు తిరిగొచ్చింది .

1996 బంగ్లాదేశ్ ప్రధాని అయ్యింది .

2009 హసీనా రెండో సారి ప్రధాని అయ్యింది .

అధికారం మనుషుల్ని మార్చేస్తుంది .

అందునా రెండో సారి అధికారం దక్కితే ఇక విచ్చలవిడి తనమే

ఆమె మెల్లమెల్లగా నియంతగా మారింది .

అవామీ లీగ్ రాజకీయ పార్టీ గా బలహీనం అయ్యింది . ప్రజల నాడి ఈమెకు అందకుండా పొయ్యింది .

మిలిటరీ ... పోలీస్ పై ఆధారపడి 15 ఏళ్లుగా నియంత పాలన సాగిస్తోంది .

పేరుకే ఎన్నికలు .

చాలా మటుకు ఫ్రాడ్ .

పాలకులకు పాలితులకు కనెక్షన్ కట్ అయితే అంతే సంగతులు .

భూకంపం తప్పక వస్తుంది .

జస్ట్ ఏ మేటర్ అఫ్ టైం .

ఏ మాటకు ఆ మాటే చెప్పుకోవాలి .

పాలనలో ఈమె అనేక మార్పులు తెచ్చింది .

ఇప్పుడు పాకిస్తాన్ అడుక్కునే స్థితిలో వుంది .

కానీ బంగ్లాదేశ్ అలా కాదు .

అనేక ఇంటర్నేషనల్ బ్రాండ్స్ కాటన్ షర్ట్స్ బంగ్లాదేశ్ లోనే తయారవుతాయి.

కరోనా బంగ్లాదేశ్ ఆర్థిక స్థితిని దెబ్బ తీసింది .

హసీనా కేమో ప్రజల నాడి తెలియకపోయే .

ఈమె భారత అనుకూల విధానాలను అనుసరించింది .

చాలా కాలం పాటు చైనా ఇండియా ఇద్దరితో మిత్రత్వం సాగించింది ..

ఇటీవల ఇండియా వైపు ఎక్కువ మొగ్గు చూపింది .

దీనితో చైనా కు కోపం .

అమెరికా ఎన్నో ఏళ్లుగా ఏదో చెయ్యాలని చూస్తోంది.

ఇప్పటి అల్లర్లకు ప్రధాన సూత్రధారి అమెరికా .

డబ్బులు అక్కడినుంచే వస్తున్నాయి .

అడుక్కునే స్థితిలో ఉన్నా పాకిస్తాన్ కూడా అగ్నికి ఆజ్యం పోస్తోంది .

ప్రజలతో సంబంధాన్ని కోల్పోయిన హసీనా ఒక పిచ్చి చట్టం తెచ్చింది .

విముక్తి పోరాటం పాల్గొన్న వారి మనవళ్లు మనవరాళ్లకు ముప్పై శాతం రిజర్వేషన్స్ .

స్థానిక తెగలకు మరో ముప్పై శాతం .

మొత్తం అరవై శాతం ఉద్యోగాలు రిజర్వేషన్స్ కింద పొతే తమ గతి ఏంటని యువత .

తన పార్టీ వారికీ ఉద్యోగాలు ఇవ్వడం కోసమే మార్పు తెచ్చింది .. దీన్ని రద్దు చెయ్యాలి అని విద్యార్థులు ఉద్యమం మొదలెట్టారు .

పిలిచి మాట్లాడి ఉంటే సమస్య పరిష్కారం అయ్యేది .

.. అధికార మదం తలకెక్కితే వాస్తవాలు కనబడవు .. వినబడవు . అక్కడే కాదు .. ఎక్కడైనా ఇంతే .

జూన్ లో విద్యార్థుల ఉద్యమం మొదలయ్యింది .

సుమారుగా 200 మంది విద్యార్థులు తుపాకీ గుళ్లకు బలయ్యారు .

చివరిగా సుప్రీమ్ కోర్ట్ ఆ రిజర్వేషన్ రద్దు చేసింది .

కానీ అప్పటికే ఆలస్యం .

విద్యార్థులు అధికార మార్పిడి- ప్రజాస్వామ్య పునరుద్ధరణ కోరుకున్నారు .

దానితో ఆమె దేశం వదిలి పారిపోవాల్సి వచ్చింది .

హిందువుల పై దాడులు .

దేశ జనాభాలో సుమారుగా తొమ్మిది శాతం హిందువులు .

హిందువులు ఏదో ఒక ప్రాంతానికి పరిమితం కాలేదు . అన్ని చోట్లా ఉన్నారు. మారుమూల గ్రామాల్లో కూడా ఉన్నారు .

హిందువుల పై దాడి అనే దానిలో మతకోణం ఒకటి .

అంతకు మించి మరి కొన్ని కారణాలున్నాయి .

హసీనా కాబినెట్ మంత్రులు అవినీతి సామ్రాట్టులు .

వీరందరూ ఇప్పుడు సింగపూర్ మలేషియా అమెరికా లాంటి దేశాలకు పారిపోయారు . వీరందరికీ ఇండియా ఆశ్రయం ఇస్తోంది అనే రూమర్ అక్కడ బలంగా వ్యాపించింది . హసీనా వెనుక వున్నది కూడా ఇండియా అని అక్కడి వారు నమ్ముతున్నారు .

ఈ దాడులు తాత్కాలికం అని హిందువుల భద్రతకు పెద్దగా ముప్పు లేదని నాకు సమాచారం ఇచ్చిన ఒక వ్యక్తి అభిప్రాయం పడ్డారు .ఈయన ఢాకా లో అత్యంత కీలక పదవిలో ఉన్నారు . నేరుగా దేశ ప్రధాని కి ఫోన్ చెయ్యగలిగిన స్థాయి . గ్రౌండ్ లెవెల్ రియాలిటీ పూర్తిగా తెలిసిన వాడు . జులై 25 ప్రత్యేక విమానం లో ఇండియా కొచ్చేసారు.

ఇప్పడేమవుతుంది ?

విద్యార్థులు రాజకీయ పార్టీ పెడితే తప్పక గెలుస్తారు . హసీనా పార్టీ పట్ల ప్రజల్లో ఎంత కోపం ఉందొ బంగ్లాదేశ్ నేషనలిస్ట్ పార్టీ పట్ల కూడా అంతే ఏవగింపు .

అంతర్జాతీయ కుట్రలు .. ప్రజాస్వామ్య కాంక్ష .. యువతలో అసంతృప్తి .. విప్లవ పథం.. మత ఛాందసవాదం .. ఇన్నింటి కిచ్చిడీ నేటి బంగ్లాదేశ్ పరిణామాలు .

నడుస్తున్న చరిత్ర!